للشاعر فهد المساعد
يا صغير السن قدرك طاحت ابراجه
الجرح خلى الصخر ينطق ونطقني
خلاص ماعاد تعنيني ولا حاجه
رح جعل ربي يوفقك ويوفقني
من بعد ماكنت نور العمر وسراجه
اليوم صرت الظلام اللي يطوقني
عطيتك اكثر من اللي كنت تحتاجه
اسرفت في الحب لين الحب وهقني
خلاص مالي ومال الحب وازعاجه
مالي ومال الدروب اللي تضايقني
تعبت اضم البحر واهدي امواجه
تعبت اجامل واشوف الوقت يسرقني
شكواي للي عليه الضيق وافراجه
اللي اذا شاء يرحمني ويرزقني
اما انت يابو جبين عقد حجاجه
لاعاد تسال علامك مانت طايقني
الناس كل على دربه ومنهاجه
وانا عن الناس مابه شي يفرقني
الا اني دايم احب الصدق واواجه
مخلوق والله على هالوضع خالقني
حتى رفيقي ضماد القلب وعلاجه
على كثر ما تمسكت فيه صدقني
لو ادري انه مرافقني على حاجه
لامسكه حاجته واقول فارقني
Home 
