نسيج(ن)على ماجال في خاطري والبـال
مشاعر لشاعر حالته بيـن حـال وحـال
الاولى تشجعني علـى البـث والابـداع
والاخرى تمانعني عن البـث والارسـال
يضيق الصدر ياشفت كيل(ن)بلـى معنـى
على وزنة(ن)دون الطلب يرجح المكيـال
صحيح الجزر والمد في حكمة الامـواج
وانا عارف المخرج وانا عارف المدخـال
مشاوير وقتي مشورتني وشفـت وعفـت
مشيت القصير من الدروب ومشيت طوال
رضيت وزعلت وقلت واشغلت تفكيـري
تماديـت والعـزّه لمنهـاي راس المـال
زماني عطاني درس واعطا هـذاك وذاك
وعطا الراحل النازل مع النازل الرحّـال
وقوفي على راس الجبل والنظر مرفـوع
عطاني شموخ المعتلي فوق هـام جبـال
قبلـت التحـدي والمداخيـل والمطـلاع
ومداهيل هوجاسي على طيّـب الافعـال
دخلت وطلعت وشفـت ماغثنـي بالحيـل
تكدّر مزاجي مـن علوم(ن)تغـث البـال
لقيـت الحقايـق بيـن طياتهـا التزويـر
على حساب تجّار الدعايـات والاهـوال
انا ازعل اذا قالوا لي الخال صايـر عـم
ويزيد الزعل ياقالو العـم صايـر خـال
انا ازعل اذا شفت المباني ضعيفة سـاس
وانا ازعل اذا شفت الذكي ماعليه عقـال
انا ازعل اذا شفت السوالف خطـا تنـدار
من القايل اللي ضيعه بيـن قيـل وقـال
انا ازعـل اذا دار الزمـن للعزيـز وذلّ
ياكن الزعل ياخذ مـن الزلزلـه زلـزال
انا ازعل اذا شيل الكبير ونـزّل حجمـه
على القاع وبحجمه عليه الصغير يشـال
انـا ازعـل اذا بـوذا تعـدد تماثيـلـه
ولقينا بـدل تمثـال واحـد ميـة تمثـال
انا ازعل اذا ركب الفرس واحد(ن)خواف
ورعاة الفرس تضحك على الفارس الخيال
انا ازعل اذا الفنجال قدم لعشـر وخمـس
وعلى العشر والعشرين ماقـدم الفنجـال
انا ازعل اذا شفت المهازل تغازل نـاس
وتبرمج رقوم المهزلـه داخـل الجـوال
انا ازعل اذا حصلت حبل الوفـا معقـود
على عقـدة الخايـن ولا حلّـه الحـلاّل
انا ازعل وانا ازعل والزعل حدني للقيـل
غيور(ن)على ربعي وانا الشاعر ابن رمال
هواجيس شاعر ياطلع يرقـب المرقـاب
والا من نزل ياخذ نزولـه مـن الشـلاّل
Home 
